Īdzeivuotuojus iņteresej pošvaļdeibu i regionaluos politikys vaicuojumi
(Da kongresa – 61 dīna)
28. aprelī paradzāts, ka kongresa delegati sasatiks Rēzeknis Tehnologeju akademejā, kab jau tradicionali četrūs pamatvierzīņūs rysynuot Latgolys i latgaliskuma atteisteibai svareigus vaicuojumus, zeimojās – tei ir latgalistika ar centriešonūs iz izgleiteibu, volūdys vaicuojumi – nu juos viesturis da lingvistiskajai ainovai, pošvaļdeibu i regionaluo politika, respektejūt uzjiemiejdarbeibys problemys, kai ari viesturis vaicuojumi nu tīsyskuma i drūšeibys aspekta.
Kai redzim nu apvaicuošonys, respondentu (itymā gadīnī tūs, kas pīsasaceja kongresam i aizpiļdeja pīteikuma anketu) leluokuo interese ir saisteita ar pošvaļdeibu i regionaluos politikys vaicuojumim, aiz jūs īt izgleiteiba, tuoļuok leidzeiguos proporcejuos sasadola tī pīsasacejušī, kam svareigi ruodīs volūdys, viesturis i uzjiemiejdarbeibys vaicuojumi (vērtīs grafiku).
Kab varātu vierzeit konkretai reiceibai praktiskus rysynuojumus, tymā pošā laikā respektejūt zynuotnei svareigū pīruodejumu, argumentaceju, statistiskū puorskotu i metodologeju, kotrā nu četru pamatvierzīņu pīsadaleis akademiskuos i profesionaluos sferys eksperti, īsaistūt diskusejā i rezolucejis prīšklykuma apsprīsšonā ari kluot asūšūs. Pa vareibai tiks nūdrūšynuota pīsasliegšona ari attuolynuotai.
Teik apkūpuoti īsnāgtī prīšklykumi, tok tys, kas atsakuortoj vysbīžuok, ir vīns nu pyrmūs sajimtūs: Volūda, volūda i vēļ reizi volūda! Partū ka vyss cyts var byut vīnolga kurā vītā pasaulī, bet sova volūda dzeiva var byut tikai Latgolā.
Aktualuo informaceja par Latgolys kongresu – www.latgolyskongress.lv
